tum vafā kā evaz jafā samjhe

ai buto tum se bas ḳhudā samjhe

paan khā kar jo aa.e maqtal meñ

kyā shahīdoñ kā ḳhūn-bahā samjhe

sar qalam karne kā thā ḳhat meñ jo haal

us kā mazmūn ham judā samjhe

kab vo talvoñ se āñkheñ malne de

jo ki mizhgāñ ko ḳhār-e-pā samjhe

ho gayā jab qalam hamārā sar

apnī qismat kā tab likhā samjhe

dauḌe kyā ho ke ḳhush sū-e-maqtal

us ke ham ghar kā rāsta samjhe

kisī sūrat se ham ko aane de

kaash darvāze kā gadā samjhe

yād-e-dandāñ meñ jo bahā aañsū

us ko ham durr-e-be-bahā samjhe

chāñdnī par vo phir rakhe na qadam

ham faqīroñ kā boriyā samjhe

terī abrū ko jo hilāl kahā

māh-e-nau se bhī kuchh sivā samjhe

marūñ to vo javāb-e-nāma likhe

ḳhat na aane kā mudda.ā samjhe

haath uThā kar lagā jo kosne vo

vaah re ham use duā samjhe

jo hai begāna āshnā hai vo

ham jo kahte haiñ koī kyā samjhe

ham ko nazroñ se pīstī haiñ aap

chashm-e-bad duur tūtiyā samjhe

jab se us kūche meñ qadam rakkhā

kīmiyā ko bhī ḳhāk-e-pā samjhe

tujh ko o naujavāñ kahā be-misl

aaj ma.anī-e-lā-fatā samjhe

ham ne jab dekhī chāñdnī chhiTkī

terī utrī huī qabā samjhe

kāsa-e-māh jab se dekh liyā

tab se gardūñ ko ham gadā samjhe

apne fahmīd pūchh mat 'goyā'

kuchh na samjhe ye bārhā samjhe