har mausam meñ ḳhālī-pan kī majbūrī ho jāoge
itnā us ko yaad kiyā to patthar bhī ho jāoge
hañste bhī ho rote bhī ho aaj talak to aisā hai
jab ye mausam saath na deñge tasvīrī ho jāoge
har aane jaane vaale se ghar kā rasta pūchhte ho
ḳhud ko dhokā dete dete be-ghar bhī ho jāoge
jiinā marnā kyā hotā hai ham to us din pūchheñge
jis din miTTī ke hāthoñ kī tum mehñdī ho jāoge
chhoTī chhoTī bātoñ ko bhī itnā sajā kar likhte ho
aise hī tahrīr rahī to bāzārī ho jāoge