tum se jaanā ki ik kitāb huuñ maiñ

harf-dar-harf lā-javāb huuñ maiñ

hasrat-e-mausam-e-gulāb huuñ maiñ

sach na ho pā.egā vo ḳhvāb huuñ maiñ

aap ne e'tibār hī na kiyā

meñ to kahtī rahī sarāb huuñ maiñ

mujh se apnī namī na suukh sakī

aap kahte haiñ āftāb huuñ maiñ

ho ke maujūd bhī nahīñ dikhtā

vo amāvas kā māhtāb huuñ maiñ

us se milte nahīñ usuul 'sahar'

chāhtī jis ko be-hisāb huuñ maiñ