kaise hotī hai shab kī sahar dekhte

kaash ham bhī kabhī jaag kar dekhte

ḳhvāb kaise utartā hai ehsās meñ

tere shāne pe rakh ke ye sar dekhte

ek ummīd thī muntazir umr bhar

kaash tum bhī kabhī lauT kar dekhte

barf kī jhīnī chādar tale jhiil thī

chhū ke mujh ko kabhī tum agar dekhte

uñgliyāñ un kī letīñ na sannyās to

merī zulfoñ se bhī khel kar dekhte

ek parvāz meñ gir na jaate agar

tere man kā gagan mere par dekhte

band kamroñ ne kholī nahīñ sāñkleñ

varna sajde meñ baiThī 'sahar' dekhte