phir tirā intizār dekheñge
dil ko phir be-qarār dekheñge
phuul khilne se pahle aa jaao
aaj mil kar bahār dekheñge
kaise chupke se lauT aatā hai
mausamoñ par ḳhumār dekheñge
tujh ko rakh kar nigāh meñ apnī
aaj apnā siñgār dekheñge
ruuTh jā.eñge maan jā.eñge
naaz kar ke hazār dekheñge
chāhatoñ ke kavach pahan leñge
phir zamāne ke vaar dekheñge
guftugū se ḳhalal na aa jaa.e
aaj bas tujh ko yaar dekheñge