kaan lagā kar suntī rāteñ bāteñ karte din
kahāñ ga.iiñ vo achchhī rāteñ bāteñ karte din
ek hī manzar shahr pe apne kab se Thahrā hai
kuchh soī kuchh jaagī rāteñ bāteñ karte din
dīvānoñ ke ḳhvāb kī sūrat an-mil aur bejoḌ
apne aap se laḌtī rāteñ bāteñ karte din
jaane kab ye mel kareñge ek-dūje ke saath
ḳhāmoshī meñ Duubī rāteñ bāteñ karte din
tanhā.ī ke ḳhauf kī dekho kyā kyā shakleñ haiñ
sannāTe meñ lipTī rāteñ bāteñ karte din
'amjad' apne saath raheñge kab tak rastoñ meñ
gahrī soch meñ uljhī rāteñ bāteñ karte din