tavīl-tar hai safar muḳhtasar nahīñ hotā

mohabbatoñ kā shajar be-samar nahīñ hotā

phir us ke ba.ad ka.ī log mil ke bichhḌe haiñ

kisī judā.ī kā dil par asar nahīñ hotā

har ek shaḳhs kī apnī hī ek manzil hai

koī kisī kā yahāñ ham-safar nahīñ hotā

tamām umr guzar jaatī hai kabhī pal meñ

kabhī to ek hī lamha basar nahīñ hotā

ye aur baat hai vo apnā hāl-e-dil na kahe

koī bhī shaḳhs yahāñ be-ḳhabar nahīñ hotā

ajiib log haiñ ye ahl-e-ishq bhī 'aḳhtar'

ki dil to hotā hai par in kā sar nahīñ hotā