dasht-e-dil meñ sarāb taaza haiñ
bujh chukī aañkh ḳhvāb taaza haiñ
dāstān-e-shikast-e-dil hai vahī
ek do chaar baab taaza haiñ
koī mausam ho dil-gulistāñ meñ
aarzū ke gulāb taaza haiñ
dostī kī zabāñ huī matrūk
nafratoñ ke nisāb taaza haiñ
āgahī ke hamārī āñkhoñ par
jis qadar haiñ azaab taaza haiñ
zaḳhm-dar-zaḳhm dil ke khāte meñ
dostoñ ke hisāb taaza haiñ
sar pe būḌhī zamīn ke 'amjad'
ab ke ye āftāb taaza haiñ