jaise maiñ dekhtā huuñ log nahīñ dekhte haiñ
zulm hotā hai kahīñ aur kahīñ dekhte haiñ
tiir aayā thā jidhar ye mire shahr ke log
kitne saadā haiñ ki marham bhī vahīñ dekhte haiñ
kyā huā vaqt kā da.avā ki har ik agle baras
ham use aur hasīñ aur hasīñ dekhte haiñ
us galī meñ hameñ yuuñ hī to nahīñ dil kī talāsh
jis jagah kho.e koī chiiz vahīñ dekhte haiñ
shāyad is baar mile koī bashārat 'amjad'
aa.iye phir se muqaddar kī jabīñ dekhte haiñ