havā.eñ laakh chaleñ lau sambhaltī rahtī hai

diye kī ruuh meñ kyā chiiz jaltī rahtī hai

kise ḳhabar ki ye ik din kidhar ko le jaa.e

lahū kī mauj jo sar meñ uchhaltī rahtī hai

agar kahūñ to tumheñ bhī na e'tibār aa.e

jo aarzū mire dil meñ machaltī rahtī hai

madār se nahīñ haTtā koī sitārā kyuuñ

ye kis hisār meñ har chiiz chaltī rahtī hai

vo aadmī huuñ sitāre huuñ yā tamannā.eñ

samay kī raah meñ har shai badaltī rahtī hai

yūñhī azal se hai 'amjad' zamīn gardish meñ

kabhī sahar to kabhī raat Dhaltī rahtī hai