zindagī dard bhī davā bhī thī

ham-safar bhī gurez-pā bhī thī

kuchh to the dost bhī vafā-dushman

kuchh mirī aañkh meñ hayā bhī thī

din kā apnā bhī shor thā lekin

shab kī āvāz be-sadā bhī thī

ishq ne ham ko ġhaib-dān kiyā

yahī tohfa yahī sazā bhī thī

gard-bād-e-vafā se pahle tak

sar pe ḳhema bhī thā ridā bhī thī

maañ kī āñkheñ charāġh thiiñ jis meñ

mere ham-rāh vo duā bhī thī

kuchh to thī rahguzar meñ sham-etalab

aur kuchh tez vo havā bhī thī

bevafā to vo ḳhair thā 'amjad'

lekin us meñ kahīñ vafā bhī thī