the ḳhvāb ek hamāre bhī aur tumhāre bhī

par apnā khel dikhāte rahe sitāre bhī

ye zindagī hai yahāñ is tarah hī hotā hai

sabhī ne bojh se laade haiñ kuchh utāre bhī

savāl ye hai ki aapas meñ ham mileñ kaise

hamesha saath to chalte haiñ do kināre bhī

kisī kā apnā mohabbat meñ kuchh nahīñ hotā

ki mushtarak haiñ yahāñ suud bhī ḳhasāre bhī

bigāḌ par hai jo tanqīd sab bajā lekin

tumhāre hisse ke jo kaam the sañvāre bhī

baḌe sukūn se Duube the Dūbne vaale

jo sāhiloñ pe khaḌe the bahut pukāre bhī

pa jaise rail meñ do ajnabī musāfir hoñ

safar meñ saath rahe yuuñ to ham tumhāre bhī

yahī sahī tirī marzī samajh na paa.e ham

ḳhudā gavāh ki mub.ham the kuchh ishāre bhī

yahī to ek havāla hai mere hone kā

yahī girātī hai mujh ko yahī utāre bhī

isī zamīn meñ ik din mujhe bhī sonā hai

isī zamīñ kī amānat haiñ mere pyāre bhī

vo ab jo dekh ke pahchānte nahīñ 'amjad'

hai kal kī baat ye lagte the kuchh hamāre bhī