shaam ghar jā.egī maiñ kidhar jā.ūñgā
aas mar jā.egī maiñ kidhar jā.ūñgā
vo parī ek din chhoḌ kar jo mujhe
chāñd par jā.egī maiñ kidhar jā.ūñgā
tū jidhar jā.egī jā.ūñgā maiñ udhar
tū kidhar jā.egī maiñ kidhar jā.ūñgā
zindagī terī tarah guzartā huuñ maiñ
tū guzar jā.egī maiñ kidhar jā.ūñgā
terā ghar hai idhar merā ghar hai khañDar
to idhar jā.egī maiñ kidhar jā.ūñgā
tere va.ade pe sab chhoḌ aayā huuñ maiñ
tū mukar jā.egī maiñ kidhar jā.ūñgā
ek din ye tabī.at mirī jān-e-jāñ
tujh se bhar jā.egī maiñ kidhar jā.ūñgā