jis tarah se phūloñ kī Dāliyāñ mahaktī haiñ
mere ghar ke āñgan meñ beTiyāñ mahaktī haiñ
phuul sā badan terā is qadar mo.attar hai
ḳhvāb meñ bhī chhū luuñ to uñgliyāñ mahaktī haiñ
maañ ne jo khilā.ī thiiñ apne pyāre hāthoñ se
zehn meñ abhī tak vo roTiyāñ mahaktī haiñ
umr saarī guzrī ho jis kī haq-parastī meñ
us kī to qayāmat tak nekiyāñ mahaktī haiñ
ho ga.ī 'razā' ruḳhsat ghar se beTiyāñ lekin
ab talak nigāhoñ meñ Doliyāñ mahaktī haiñ