us ne afshāñ jo chunī raat ko tanhā ho kar
āsmāñ TuuT paḌā mujh pe sitāra ho kar
bhaukeñ mahloñ pe na mun.im sag-e-duniyā ho kar
haDDiyāñ qabr meñ rah jā.eñgī chūnā ho kar
vo jale tan hoñ mire par bhī jo miTTī meñ milūñ
gard-bād uThne lagīñ āg-bagūlā ho kar
mai-kashī meñ jo huā chashm-e-ḳhumārī kā ḳhayāl
rah gayā jaam hathelī kā phapholā ho kar
'shād' ye ishq-e-zanaḳhdāñ meñ hai dil Dālūñ Dol
kuud paḌtā huuñ maiñ har chaah meñ andhā ho kar