kyā ye but baiTheñge ḳhudā ban kar
allāh allāh ai barahman kar
hogā barbād misl-e-kāġhaz baad
sar ko khīñchā falak pe gar tan kar
ḳhanjar-o-teġh kar gale pe ravāñ
pher kar aañkh kaj na chitvan kar
ai tirī shaan ho gayā insāñ
ek musht-e-ġhubār ban-Than kar
paak dāman hai mariyam-e-sānī
chashm-e-tar tifl-e-ashk ko jan kar
dil ke Dasne meñ hai ye kaalā naag
zulf-e-pechāñ se bil na nāgan kar
tū agar haDDiyoñ kā maalā hai
ism-e-āzam kī dard sumran kar
hai ye chhalnī mazār-e-'shād'-e-ġharīb
dhuup aatī hai laash par chhan kar