yuuñ to kahne ko tirī raah kā patthar niklā
tū ne Thokar jo lagā dī to mirā sar niklā
log to jā ke samundar ko jalā aa.e haiñ
maiñ jise phūñk kar aayā vo mirā ghar niklā
ek vo shaḳhs jo phūloñ se bhare thā dāman
har kaf-e-gul meñ chhupā.e hue ḳhanjar niklā
yuuñ to ilzām hai tūfāñ pe Dubo dene kā
tah meñ dariyā kī magar naav kā lañgar niklā
ghar ke ghar ḳhaak hue jal ke nadī suukh ga.ī
phir bhī un āñkhoñ meñ jhāñkā to samundar niklā
farsh tā arsh koī nām-o-nishāñ mil na sakā
maiñ jise DhūñDh rahā thā mire andar niklā