maiñ jab bhī koī achhūtā kalām likhtā huuñ
to pahle ek ġhazal tere naam likhtā huuñ
badan kī aañch se sañvlā ga.e haiñ pairāhan
maiñ phir bhī sub.h ke chehre pe shaam likhtā huuñ
chale to TūTeñ chaTTāneñ ruke to aag lage
shamīm-e-gul ko to nāzuk-ḳhirām likhtā huuñ
ghaTā.eñ jhuum ke barsīñ jhulas ga.ī khetī
ye hādsa hai ba-sad-e-ehtirām likhtā huuñ
zamīn pyāsī hai būḌhā gagan bhī bhūkā hai
maiñ apne ahd ke qisse tamām likhtā huuñ
chaman ko auroñ ne likkhā hai mai-kada bar dosh
maiñ phuul phuul ko ātish-ba-jām likhtā huuñ
na rābta na koī rabt hī rahā 'bekal'
us ajnabī ko magar maiñ salām likhtā huuñ