chehre pe damak uThtā hai jab rañg-e-hayā aur
aise meñ maza detī hai apnī hī adā aur
gar jaañ bhī mirī jaa.e to bāñhoñ meñ tumhārī
dil meñ koī ḳhvāhish hī nahīñ is ke sivā aur
dar chhoḌ ke terā to kahīñ jā na sakūñgī
kāfir to nahīñ huuñ jo banā lūñgī ḳhudā aur
har chand ki ghāyal huuñ magar saañs hai baaqī
jiine kī mujhe dījiye ab koī sazā aur
likhne haiñ mujhe ḳhvāb ke pannoñ pe ujāle
āñkhoñ meñ jalā lūñgī 'samīna' maiñ diyā aur