suno to āriza-e-iḳhtilāj rahne do

sukūñ ke Thiik nahīñ haiñ mizāj rahne do

ba-hukm-e-shāh taqārīb-e-amn kal hoñge

sharar-gazīda hai māhaul aaj rahne do

tum apnī nabz kī raftār par nazar rakkho

ḳhilāf-e-gardish-e-nau-ehtijāj rahne do

kisī ko saaya kisī ko gul-o-samar degā

harā bharā hai daraḳht-e-rivāj rahne do

zamīn-e-fikr-o-hunar bāñjh hai abhī 'rāhī'

husūl-e-dād vasūl-e-ḳhirāj rahne do