hashr-e-zulmāt se dil Dartā hai
is ghanī raat se dil Dartā hai
barf-e-ehsās na gal jaa.e kahīñ
sail-e-auqāt se dil Dartā hai
tū bhī ai dost na ho jaa.e judā
ab har ik baat se dil Dartā hai
ye kaḌī dhuup dahaktā sūraj
saa.e ke saat se dil Dartā hai
haa.e vo reñgtī tanhā.ī jab
apnī hī zaat se dil Dartā hai
kaise dekheñge vo ujḌī āñkheñ
ab mulāqāt se dil Dartā hai
zaḳhm ho jā.eñge bāġhoñ ke hare
'shām' barsāt se dil Dartā hai