muḌ ke dekhūñ to nahīñ koī magar lagtā hai

ek saaya sā pas-e-gard-e-safar lagtā hai

kaan dhartā huuñ to hotī hai samā.at majrūh

apnī hī ḳhvāhish-e-be-bāk se Dar lagtā hai

is tamāshe se nikal paañv to ghar bhī dekhūñ

ye tamāsha jo sar-e-rāhguzar lagtā hai

niiñd aa jaa.e to phir dhuup na saaya koī

paañv thak jaa.eñ to pardes bhī ghar lagtā hai

aañkh uThātā huuñ to hai raah meñ haa.il dīvār

paañv rakhtā huuñ to dīvār meñ dar lagtā hai

kyā qayāmat hai ki aatā hai na jaatā hai koī

ik hayūlā pas-e-dīvār magar lagtā hai

baat kartā huuñ to maḳhmūr sā ho jaatā huuñ

us kī bātoñ meñ 'ziyā' mai kā asar lagtā hai