dil meñ jab terī lagan raqs kiyā kartī thī
merī har saañs meñ ḳhushbū sī basā kartī thī
ab to mahfil se bhī hotā nahīñ kuchh ġham kā ilaaj
pahle tanhā.ī bhī dukh baañT liyā kartī thī
ab jo raqsā hai ka.ī rañg bhare chehroñ meñ
yahī miTTī kabhī bekār uḌā kartī thī
rañg ke jaal hī milte haiñ jidhar jaatā huuñ
raushnī yuuñ na mujhe tañg kiyā kartī thī
ab mujhe chāñdnī kuchh bhī to nahīñ kahtī hai
kabhī ye tere sandese bhī diyā kartī thī
kis qadar pyaar se ye peḌ bulāte the mujhe
kis tarah chhāñv tirā zikr kiyā kartī thī