phir ik sāthī mujhe akelā chhor gayā
aap sidhārā apnā saayā chhoḌ gayā
us ko kitne peḌ sadā.eñ dete the
vo to sab ko yūñhī bulātā chhoḌ gayā
ab tak maidānoñ ke jism chamakte haiñ
jaane kaisī miTTī dariyā chhoḌ gayā
lipaT lipaT kar ik duuje se rote haiñ
jin pattoñ ko havā kā jhoñkā chhoḌ gayā
chāñdnī shab tū jis ko DhūñDne aa.ī hai
ye kamra vo shaḳhs to kab kā chhoḌ gayā
chaal thī kitnī tez badalte mausam kī
kitne hī lamhoñ ko sisaktā chhoḌ gayā
saarī muñDereñ vīrāñ vīrāñ rahtī haiñ
jab se 'shām' nagar tū apnā chhoḌ gayā