ek laġhzish meñ dar-e-pīr-e-muġhāñ tak pahuñche

ham bhaTakte the kahāñ aur kahāñ tak pahuñche

lutf to jab hai ki ai mahram-e-husn-e-guftār

ho koī baat magar husn-e-butāñ tak pahuñche

ye bhī kuchh kam nahīñ ai rah-rav-e-iqlīm-e-yaqīñ

ham ḳharābāt-nashīñ husn-e-gumāñ tak pahuñche

tai huī manzil-e-ḳhārā-shikanī do din meñ

log sadiyoñ meñ dil-e-shīshagarāñ tak pahuñche

zauq-e-shīrīni-e-guftār fuzūñ aur huā

zahr jitne the vo sab ahl-e-zabāñ tak pahuñche

vo kahāñ dard jo dil meñ tire mahdūd rahā

dard vo hai jo dil-e-kaun-o-makāñ tak pahuñche

aag bhaḌkī hai to ab kaun ye kah saktā hai

shola-e-dāman-e-tahzīb kahāñ tak pahuñche

māvarā lafz o bayāñ se hai vo husn-e-azalī

kam-nazar marhala-e-lafz-o-bayāñ tak pahuñche

faiz-e-mehrāb-e-ġhazal hai ki 'ravish' ahl-e-nazar

husn-o-rānā.i-e-andāz-e-bayāñ tak pahuñche