qanā.at umr-bhar kī ghar ke bām-o-dar pe rakkhī thī

maiñ zer-e-āsmāñ thā dhuup mere sar pe rakkhī thī

ta.ajjub kyā jo ab bhī DhūñDte haiñ sañg-e-dar koī

ki ham ne ibtidā tahzīb kī patthar pe rakkhī thī

vahī chehre lahū kī garm-bāzārī meñ shāmil the

jinhoñ ne apnī gardan baḌh ke ḳhud ḳhanjar pe rakkhī thī

maiñ āshiq huuñ badal Daalā mujhe ishq-o-qanā.at ne

ujālā dil meñ thā duniyā mirī Thokar pe rakkhī thī

na jaane maiñ kahāñ bhaTkā kiyā ḳhvāboñ kī bastī meñ

khulī jab aañkh to dekhā thakan bistar pe rakkhī thī

mire bachchoñ ne vo dastār bhī jaane kahāñ rakh dī

buzurgoñ kī nishānī thī abhī tak ghar pe rakkhī thī

vahī tahzīb ab ham ko 'ziyā' jiine nahīñ detī

kabhī buniyād jis kī ham ne māl-o-zar pe rakkhī thī