ḳhvāb-e-dīdār na dekhā ham ne

ġhā.ebāna unheñ chāhā ham ne

kam na thā ishq azal se rusvā

kar diyā aur bhī rusvā ham ne

zindagī mahv-e-ḳhud-ārā.ī thī

aañkh uThā kar bhī na dekhā ham ne

raah se duur nazar aa.e jo ḳhaar

un ko palkoñ se uThāyā ham ne

le liyā koh-e-havādis sar par

vaqt ke dil ko na toḌā ham ne

kar diyā faash tirā ġham le kar

rāz-e-ejāz-e-masīhā ham ne

koh sañgīn haqā.eq thā jahāñ

husn kā ḳhvāb tarāshā ham ne

dard ālūda-e-darmāñ thā 'ravish'

dard ko dard banāyā ham ne