sazā kā haal sunā.eñ jazā kī baat kareñ
ḳhudā milā ho jinheñ vo ḳhudā kī baat kareñ
unheñ pata bhī chale aur vo ḳhafā bhī na hoñ
is ehtiyāt se kyā mudda.ā kī baat kareñ
hamāre ahd kī tahzīb meñ qabā hī nahīñ
agar qabā ho to band-e-qabā kī baat kareñ
har ek daur kā maz.hab nayā ḳhudā laayā
kareñ to ham bhī magar kis ḳhudā kī baat kareñ
vafā-shi.ār ka.ī haiñ koī hasīñ bhī to ho
chalo phir aaj usī bevafā kī baat kareñ