jurm-e-ulfat pe hameñ log sazā dete haiñ

kaise nādān haiñ sho.aloñ ko havā dete haiñ

ham se dīvāne kahīñ tark-e-vafā karte haiñ

jaan jaa.e ki rahe baat nibhā dete haiñ

aap daulat ke tarāzū meñ diloñ ko tauleñ

ham mohabbat se mohabbat kā sila dete haiñ

taḳht kyā chiiz hai aur la.al-o-javāhar kyā haiñ

ishq vaale to ḳhudā.ī bhī luTā dete haiñ

ham ne dil de bhī diyā ahd-e-vafā le bhī liyā

aap ab shauq se de leñ jo sazā dete haiñ