chehre pe ḳhushī chhā jaatī hai āñkhoñ meñ surūr aa jaatā hai

jab tum mujhe apnā kahte ho apne pe ġhurūr aa jaatā hai

tum husn kī ḳhud ik duniyā ho shāyad ye tumheñ mālūm nahīñ

mahfil meñ tumhāre aane se har chiiz pe nuur aa jaatā hai

ham paas se tum ko kyā dekheñ tum jab bhī muqābil hote ho

betāb nigāhoñ ke aage parda sā zarūr aa jaatā hai

jab tum se mohabbat kī ham ne tab jā ke kahīñ ye raaz khulā

marne kā salīqa aate hī jiine kā shu.ūr aa jaatā hai