fan jo nādār tak nahīñ pahuñchā
abhī me.ayār tak nahīñ pahuñchā
us ne bar-vaqt be-ruḳhī bartī
shauq āzār tak nahīñ pahuñchā
aks-e-mai ho ki jalva-e-gul ho
rañg-e-rukHsār tak nahīñ pahuñchā
harf-e-inkār sar buland rahā
zo.af-e-iqrār tak nahīñ pahuñchā
hukm-e-sarkār kī pahuñch mat pūchh
ahl-e-sarkār tak nahīñ pahuñchā
adl-gāheñ to duur kī shai haiñ
qatl aḳhbār tak nahīñ pahuñchā
inqilābāt-e-dahr kī buniyād
haq jo haqdār tak nahīñ pahuñchā
vo masīhā-nafas nahīñ jis kā
silsila-dār tak nahīñ pahuñchā