jab baḌhā dard kī maujoñ kā dabāv sāhab
merī sāñsoñ kī larazne lagī naav sāhab
is se baḌh kar nahīñ afsurda-mizājī kā ilaaj
dil agar ro.e to auroñ ko hañsāo sāhab
ghup añdhere meñ ugātā huuñ suḳhan kā sūraj
be-sabab thoḌī hai rātoñ se lagāv sāhab
jab nahīñ miltī na.e zaḳhm kī sauġhāt mujhe
chhīl detā huuñ purānā koī ghaav sāhab
jis kī dānā.ī ne mansūḳh kiye hosh-o-havās
aise nādān pe patthar na uThāo sāhab
maiñ ne us husn-e-mujassam kī ziyārat kī hai
merī āñkhoñ ke zarā daam lagāo sāhab
bijliyāñ vasl kī sāñsoñ pe girāo sāhab
ruḳh se bhīgī huī zulfoñ ko haTāo sāhab
jaise sahrāoñ meñ milte haiñ do pyāse dariyā
hoñT se hoñT kuchh is tarah milāo sāhab
dil mohabbat kī saqāfat kā azal se hai amiiñ
is shahanshāh ko nafrat na sikhāo sāhab
jiit kar jashn manānā to huī aam sī baat
haar kar bhī to kabhī jashn manāo sāhab
ham na.e ahd ke suqrāt haiñ is baar hameñ
zahr kā pyāla nahīñ jaam pilāo sāhab