ḳhud apne saath safar meñ rahe to achchhā hai
vo be-ḳhabar hai ḳhabar meñ rahe to achchhā hai
qadam qadam yūñhī rakhnā diloñ meñ andesha
charāġh rāhguzar meñ rahe to achchhā hai
kabhī kabhī mire dāman ke kaam aa.egī
ye dhuup dīda-e-tar meñ rahe to achchhā hai
maiñ dil kā haal na aane duuñ apnī palkoñ tak
ye ghar kī baat hai ghar meñ rahe to achchhā hai
kiyā hai tund havāoñ kā sāmnā jis ne
vo phuul shāḳh-e-shajar meñ rahe to achchhā hai