use bechain kar jā.ūñgā maiñ bhī
ḳhamoshī se guzar jā.ūñgā maiñ bhī
mujhe chhūne kī ḳhvāhish kaun kartā hai
ki pal bhar meñ bikhar jā.ūñgā maiñ bhī
bahut pachhtā.egā vo bichhaḌ kar
ḳhudā jaane kidhar jā.ūñgā maiñ bhī
zarā badlūñgā is be-manzarī ko
phir us ke baad mar jā.ūñgā maiñ bhī
kisī dīvār kā ḳhāmosh saaya
pukāre to Thahar jā.ūñgā maiñ bhī
pata us kā tumheñ bhī kuchh nahīñ hai
yahāñ se be-ḳhabar jā.ūñgā maiñ bhī