sub.h-dam bhī yuuñ fasurda ho gayā
ai dil-e-nāzuk tujhe kyā ho gayā
sīna-e-barbat se jo sho.ala uThā
ġham-zadoñ ke dil kā naġhma ho gayā
shukriya ai gardish-e-jām-e-sharāb
maiñ bharī mahfil meñ tanhā ho gayā
raat dil ko thā sahar kā intizār
ab ye ġham hai kyuuñ saverā ho gayā
pūchhiye us se ġham-e-sāz-e-ḳhulūs
chaar hī din meñ jo rusvā ho gayā
bujh ga.ī kuchh is tarah sham-e-'salām'
jaise ik bīmār achchhā ho gayā