un kī be-ruḳhī meñ bhī iltifāt shāmil hai
aaj kal mirī hālat dekhne ke qābil hai
qatl ho to merā sā maut ho to merī sī
mere sogvāroñ meñ aaj merā qātil hai
har qadam pe nākāmī har qadam pe mahrūmī
ġhāliban koī dushman dostoñ meñ shāmil hai
muztarib haiñ maujeñ kyuuñ uTh rahe haiñ tūfāñ kyuuñ
kyā kisī safīne ko ārzū-e-sāhil hai
sirf rāhzan hī se kyuuñ 'amīr' shikva ho
manziloñ kī rāhoñ meñ rāhbar bhī haa.il hai