jañg jaarī hai ḳhāndānoñ meñ
ġhair mahfūz huuñ makānoñ meñ
lafz pathrā ga.e haiñ hoñToñ par
log kyā kah ga.e haiñ kānoñ meñ
raat ghar meñ thī sar-phirī āñdhī
sirf kāñTe haiñ phūl-dānoñ meñ
mābadoñ kī ḳhabar nahīñ mujh ko
ḳhairiyat hai sharāb-ḳhānoñ meñ
ab sipar DhūñD koī apne liye
tiir kam rah ga.e kamānoñ meñ
nāḳhudā kyā ḳhudā rakhe mahfūz
vo havā.eñ haiñ bādbānoñ meñ
daal chunane meñ haath ā.eñge
jitne kañkar haiñ kār-ḳhānoñ meñ
DhūñDtā phir rahā huuñ ḳhālī haath
jaane kyā chiiz un dukānoñ meñ