sub.h tak maiñ sochtā huuñ shaam se
jī rahā hai kaun mere naam se
shahr meñ sach boltā phirtā huuñ maiñ
log ḳhā.if haiñ mire anjām se
raat bhar jāgegā chaukī-dār ek
aur sab so jā.eñge ārām se
sau baras kā ho gayā merā mazār
ab navāzā jā.ūñ gā in.aam se
saath lā.ūñgā thakan be-kār kī
ghar se bāhar jā rahā huuñ kaam se
naam le us kā safar āġhāz kar
duur rakh dil ko zarā auhām se
zindagī kī dauḌ meñ pīchhe na thā
rah gayā vo sirf do ik gaam se