har gaam hādsa hai Thahar jā.iye janāb
rasta agar ho yaad to ghar jā.iye janāb
zinda haqīqatoñ ke talātum haiñ sāmne
ḳhvāboñ kī kashtiyoñ se utar jā.iye janāb
inkār kī salīb huuñ sachchā.iyoñ kā zahr
mujh se mile baġhair guzar jā.iye janāb
din kā safar to kaT gayā sūraj ke saath saath
ab shab kī anjuman meñ bikhar jā.iye janāb
koī churā ke le gayā sadiyoñ kā e'tiqād
mimbar kī sīḌhiyoñ se utar jā.iye janāb