jaane ye kis kī banā.ī huī tasvīreñ haiñ
taaj sar par haiñ magar paañv meñ zanjīreñ haiñ
kyā mirī soch thī kyā sāmne aayā mere
kyā mire ḳhvāb the kyā ḳhvāb kī tābīreñ haiñ
kitne sar haiñ ki jo gardan-zadanī haiñ ab bhī
ham ki buzdil haiñ magar haath meñ shamshīreñ haiñ
chaar jānib haiñ siyah raat ke saa.e lekin
ufuq-e-dil pe na.ī sub.h kī tanvīreñ haiñ
us kī āñkhoñ ko ḳhudā yuuñ hī salāmat rakkhe
us kī āñkhoñ meñ mire ḳhvāb kī tābīreñ haiñ