fikr-e-ġhurbat hai na andesha-e-tanhā.ī hai

zindagī kitne havādis se guzar aa.ī hai

log jis haal meñ marne kī duā karte haiñ

maiñ ne us haal meñ jiine kī qasam khaa.ī hai

ham na suqrāt na mansūr na iisā lekin

jo bhī qātil hai hamārā hī tamannā.ī hai

zindagī aur haiñ kitne tire chehre ye batā

tujh se ik umr kī hālāñki shanāsā.ī hai

kaun nā-vāqif-e-anjām-e-tabassum hai 'amīr'

mere hālāt pe ye kis ko hañsī aa.ī hai