sarhad-e-fanā tak bhī tīrgī nahīñ aa.ī
yuuñ bhī raas añdheroñ kī zindagī nahīñ aa.ī
tum sharāb pī kar bhī hosh-mand rahte ho
jaane kyuuñ mujhe aisī mai-kashī nahīñ aa.ī
jis kī bhī tabāhī ho kuchh asar to rakhtī hai
aaj merī hālat par kyuuñ hañsī nahīñ aa.ī
aur bhī daraḳhshāñ ho ai mire na.e sūraj
ab bhī mere āñgan meñ raushnī nahīñ aa.ī
rahravān-e-dānish kī zindagī batātī hai
kaam kin manāzil meñ āgahī nahīñ aa.ī
log chaar hī din meñ ban ga.e 'salām' ai dil
aur ḳhud mujhe ab tak shā.erī nahīñ aa.ī