kuchh dafn hai aur saañs liye jaatā hai
ik saañp hai jo qalb meñ lahrātā hai
ik guuñj hai jo ḳhuun meñ chakrātī hai
ik raaz hai pur-pech huā jaatā hai
ik shor hai jo kuchh nahīñ sunñe detā
ik ghar thā jo bāzār huā jaatā hai
ik narm kalī hai jo khilī paḌtī hai
ik dasht-e-balā hai ki jalā jaatā hai
ik ḳhauf hai jo kuchh nahīñ karne detā
ik ḳhvāb hai jo niiñd meñ taḌpātā hai
do paañv haiñ jo haar ke ruk jaate haiñ
ik sar hai jo dīvār se Takrātā hai