kiyā hai sandalīñ-rañgoñ ne dar band

mirā ho kis tarah se dard-e-sar band

nahīñ haiñ tere dām-e-zulf meñ dil

laTakte haiñ hazāroñ murġh par-band

nahīñ but-ḳhāna o ka.aba pe mauqūf

huā har ek patthar meñ sharar band

raqīboñ se huī hai bazm ḳhālī

karo darvāza be-ḳhauf-o-ḳhatar band

tamāshā band āñkhoñ meñ hai mujh ko

huī merī ba-zāhir chashm-e-tar band

nahīñ duniyā meñ āzādī kisī ko

hai din meñ shams aur shab ko qamar band

dikhāo mai-kasho ab zor-e-mastī

kiyā zāhid ne mai-ḳhāne kā dar band

dar-e-jānāñ bhī ik marja.a hai 'bahrām'

hujūm-e-āshiqāñ hai rahguzar band