rū bhī aks-e-rū bhī maiñ

maiñ bhī maiñ huuñ tū bhī maiñ

ḳhud se bach kar jā.ūñ kahāñ

huuñ goyā har sū bhī maiñ

le kar ruḳh par itne kalañk

lagtā huuñ ḳhush-rū bhī maiñ

shāmil-e-mai paimāna bhar

piitā huuñ aañsū bhī maiñ

sadqe maiñ un āñkhoñ ke

siikh gayā jaadū bhī maiñ

us kī bazm-e-nāz se duur

us ke ham-pahlū bhī maiñ

diid se be-parvā ho kar

shauq se be-qābū bhī maiñ

bair hī rakhtā mujh se sanam

hotā gar hindū bhī maiñ

vaa.e tilism-e-naqsh-e-farañg

bhuul gayā urdu bhī maiñ

qaa.el ḳhud bhī huuñ 'haqqī'

shāġhil-e-illā-hū bhī maiñ