bahār-e-zaḳhm-e-lab-e-ātishīñ huī mujh se

kahānī aur asar-āfrīñ huī mujh se

maiñ ik sitāra uchhālā to nuur phail gayā

shab-e-firāq yūñhī dil-nashīñ huī mujh se

gulāb thā ki mahakne lagā mujhe chhū kar

kalā.ī thī ki bahut marmarīñ huī mujh se

baġhal se saañp nikāle to ho gayā badnām

ḳharāb achchhī tarah āstīñ huī mujh se

kahāñ se aa.ī hai ḳhushbū mujhe bhī hairat hai

ye raat kaise gul-e-āsmīñ huī mujh se

maiñ apne phuul khilā.e haiñ us kī jhāḌī par

qabā-e-yār bahut reshmīñ huī mujh se

bas ek bosa diyā thā kisī ke māthe par

tamām-shahr kī raushan jabīñ huī mujh se

ġhazal sunī to bahut dil se ḳhush huā 'ātif'

magar ġhazal kī satā.ish nahīñ huī mujh se