bāda-e-ḳhum-e-ḳhāna-e-tauhīd kā mai-nosh huuñ
chuur huuñ mastī meñ aisā be-ḳhud-o-mad.hosh huuñ
gird phirne de mujhe saaqī ye merā farz hai
misl-e-sāġhar daur meñ huuñ bāda-e-sar-josh huuñ
tarz-e-ḳhāmoshī mirī batlātī hai is raaz ko
huuñ navāsanj-e-haqīqat laakh maiñ ḳhāmosh huuñ
dardmand-e-ishq ho kar zabt kā ḳhūgar huuñ maiñ
sūrat-e-sīmāb ho kar paikar-e-ḳhāmosh huuñ
kis kī furqat vasl kis kā aur hai ma.ashūq kaun
'shād' maiñ is ālam-e-takvīñ kā ham-āġhosh huuñ