maiñ ye kis ke naam likkhūñ jo alam guzar rahe haiñ

mire shahr jal rahe haiñ mire log mar rahe haiñ

koī ġhuncha ho ki gul ho koī shāḳh ho shajar ho

vo havā-e-gulistāñ hai ki sabhī bikhar rahe haiñ

kabhī rahmateñ thiiñ nāzil isī ḳhitta-e-zamīñ par

vahī ḳhitta-e-zamīñ hai ki azaab utar rahe haiñ

vahī tā.eroñ ke jhurmuT jo havā meñ jhūlte the

vo fazā ko dekhte haiñ to ab aah bhar rahe haiñ

baḌī aarzū thī ham ko na.e ḳhvāb dekhne kī

so ab apnī zindagī meñ na.e ḳhvāb bhar rahe haiñ

koī aur to nahīñ hai pas-e-ḳhanjar-āzmā.ī

hamīñ qatl ho rahe haiñ hamīñ qatl kar rahe haiñ