hādsoñ se be-ḳhabar the log dhartī par tamām

āsmāñ kī nīlgūñ āñkhoñ meñ the manzar tamām

rafta rafta rasm-e-sañg-bārī jahāñ se uTh ga.ī

dhīre dhīre ho ga.e bastī ke sab patthar tamām

tishna-lab dhartī pe jab bahtā hai pyāsoñ kā lahū

muddatoñ maqtal meñ sar ḳham rahte haiñ ḳhanjar tamām

zindagī bikhrī huī hai is tarah fōtpath par

bastiyāñ ābād haiñ aur log haiñ be-ghar tamām

shāhrāheñ daf.atan sho.ale ugalne lag ga.iiñ

ghar kī jānib chal paḌā hai shahr ghabrā kar tamām

sub.h ke saare ujāle rāstoñ meñ kho ga.e

shab ke añdhiyāroñ meñ gum haiñ shaam ke manzar tamām

ab kahāñ vo log vo raunaq vo naġhme vo fazā

shahr kī galiyāñ haiñ suunī suune bām-o-dar tamām