dekhā jo marg to marnā ziyāñ na thā
faanī ke badle mulk-e-baqā kuchh garāñ na thā
shab ko baġhal meñ thā bhī to vo dilsitāñ na thā
shoḳhī ye kah rahī thī ki yaañ thā vahāñ na thā
be-vaj.h muñh chhupāne se jo thā nihāñ na thā
par ḳhair thī kuchh is meñ ki maiñ bad-gumān na thā
ye to nahīñ ki ab ke vo mutlaq vahāñ na thā
lekin savāl-e-vasl ye kahne ko haañ na thā
vo but hī kahūñ zamīñ pe jo bala-garāñ na thā
ham-sañg lekin us kā magar āsmāñ na thā
hasrat ke sadqe aañkh ke malte hī khul gayā
vo kuchh ki mumkināt se jis kā bayāñ na thā
naala jo apnā pāya-e-tāsīr se girā
itnā subuk huā ki maiñ itnā garāñ na thā
the bazm meñ vo ġhuncha-e-afsurda sharm se
kyūñkar kahūñ bahār meñ rañg-e-ḳhizāñ na thā
kaisī hayā kahāñ kī vafā pās-e-ḳhalq kyā
haañ ye sahī ki aap ko aanā yahāñ na thā
sab kaam apnī ek nigah par haiñ munhasir
goyā mire liye to banā āsmāñ na thā
kyuuñ mujh pe tez kī nigah-e-qahr kī chhurī
maiñ daur-e-charḳh meñ koī sañg-e-fasāñ na thā
kuchh apne dil ke valvale kuchh zāhidoñ kī zid
sar phoḌne ko varna vahī āstāñ na thā
ā.īna ko vo dekhte haiñ un kī shakl ham
thā ham ko vo gumāñ ki unhīñ vo gumāñ na thā
inkār mahz mahz ġhalat mezbāñ sahī
maanā ki bazm-e-ġhair meñ tū mehmāñ na thā
dushman harīf-e-rāh-e-vafā hai ḳhudā kī shaañ
vahāñ jis pe thā yaqīn mujhe us kā gumāñ na thā
hairān huuñ hijāb-e-judā.ī uThā na kyuuñ
vo nāznīñ the maiñ to koī nā-tavāñ na thā
ab āsmāñ ban ke mirā mudda.ī banā
thī lab pe kuchh fuġhāñ to falak kā nishāñ na thā
Tapkā zamīñ pe gar falak-e-pīr ko to kyā
phir ye kaheñge sab ki vo kuchh naujavāñ na thā
kuchh jazb dil meñ jaan ke samjhe the un ko paas
ek vahm se yaqīn pe kyā kuchh gumāñ na thā
gardūñ se aaj hai falak-e-zulm phaT paḌā
siina meñ aaj hī dam-e-ātish-fishāñ na thā
husn-e-jahāñ-faroz se jis jā na the vo but
maiñ be-nishāniyoñ se jahāñ thā vahāñ na thā
yuuñ ḳhāmushī se ḳhush ki vo tasvīr the magar
yuuñ baat se ba-tañg ki guyyañ vahāñ na thā
bhārī hue yahāñ to subuk hogī zindagī
vahāñ to nazar se ham ko girānā garāñ na thā
the be-ḳhudī meñ paas vo hosh aa.ī to ga.e
chūke ġhazab hī hosh meñ aanā yahāñ na thā
aanā ye un kā sub.h ko merī ajal ke saath
ya.anī ki nāla-e-shab-e-ġham rā.egāñ na thā
thā kuchh shikast-e-dil se mirā imtihān-e-sabr
vahāñ apnī nāzukī kā faqat imtihāñ na thā
be-mehr yuuñ na ho ki ye ḳhush ho ke maiñ kahūñ
shāyad ki tū raqīb pe bhī mehrbāñ na thā
maiñ aur roz-e-vasl-e-adū aur shab-e-firāq
yahāñ āsmāñ na thā ki vahāñ āsmāñ na thā
farhād kohkan thā ye ik halkī baat hai
āshiq thā be-sutūñ kā uThānā garāñ na thā
shab mujh se aañkh maltī rahī dil raqīb se
yahāñ yuuñ sitam rahā ki kisī par ayaañ na thā
thā dostoñ kā yaar tarīq aur diloñ se duur
kyā thā jo maiñ ġhubār-e-pas-e-kārvāñ na thā
hairān huuñ ki dam meñ tire kyūñki aa gayā
maiñ varna apne dil meñ kahāñ se kahāñ na thā
martā huuñ ki kyuuñ na rahā dil meñ tīr-e-yār
ārām-jāñ thā koī āzār-jāñ na thā
dekhā na aañkh uThā ke mujhe nāzukī se jhuuT
aisā to kuchh nigāh kā uThānā garāñ na thā
ḳhālī dar un kā paayā to dil vahm se rukā
thā pāsbāñ meñ aap jo vahāñ pāsbāñ na thā
kis be-dilī se hijr meñ kī ham ne zindagī
dil thā kahāñ ki yahāñ vo but-e-dilsitāñ na thā
miT jaanā apnā us kā rahā sab ke dil pe naqsh
ek ye bhī thā nishāñ ki mirā kuchh nishāñ na thā
kuchh vahm sadd-e-rāh-e-sitam thā ki vaqt-e-zab.h
mere gulū pe ḳhanjar-e-qātil ravāñ na thā
'anvar' ne badle jaan ke lī jins-e-dard-e-dil
aur is pe naaz ye ki ye saudā garāñ na thā